لاہور( خصوصی نامہ نگار) بانی جماعت اسلامی مولانا سید ابوالاعلیٰ مودودی کو بچھڑے ہوئے 36 سال بیت گئے اور آج انکی 36 ویں برسی ہے ۔ انہیں خراج عقیدت پیش کرنے کیلئے خصوصی تقریبات ہونگی ۔ مولانا مودودی 25 ستمبر 1903 ء کو حیدر آباد دکن کے شہر اورنگ آباد میں پیدا ہوئے ۔ 1925 ء میں ’’ الجمعیتہ‘‘ دہلی کی ادارت سنبھالی جو چار سال تک جاری رہی ۔ 1932 ء میں ماہانہ ’’ ترجمان القرآن ‘‘ کا اجراء کیا ۔ 26 اگست 1941 ء کو لاہور میں جماعت اسلامی کی بنیاد رکھی اور جماعت اسلامی کے پہلے امیر منتخب ہوئے ۔ 1973 ء میں مسلسل علالت کی وجہ سے جماعت اسلامی کی امارت سے معذرت کر لی ۔ 1979 ء میں علاج کی غرض سے مولانا مودودی امریکہ گئے ۔ 22 ستمبر 1979 ء کو بفیلو ہسپتال امریکہ میں انتقال کر گئے ۔ مولانا مودودی نے معرکتہ الآراء تفسیر ’’ تفہیم القرآن ‘‘ چھ جلدوں میں لکھی۔ ’’ سیرت سرور عالم ؐ ‘‘ بھی آپکی معروف سیرت کی کتاب ہے ۔ ان کی کئی کتابوں کا کم و بیش 70 عالمی زبانوں میں ترجمہ ہوچکا ہے ۔