اسلام آباد (اے پی پی) پاکستان میں سعودی عرب کے سفیر عبداللہ الزہرانی نے کہا ہے کہ سعودی عرب پاکستان میں سرمایہ کاری کے مواقع سے فائدہ اٹھانے کیلئے اپنے تاجروں کی حوصلہ افزائی کر رہا ہے۔ سعودی عرب کے قومی دن کے موقع پر پیغام میں انہوں نے کہا کہ پاکستان اور سعودی عرب کے درمیان بہترین تعلقات ہیں جنہیں الفاظ میں بیان نہیں کیا جا سکتا۔ انہوں نے واضح کیا کہ دونوں ممالک کے درمیان اقتصادی تعاون کو فروغ دینے کے بڑے روشن امکانات ہیں۔ انہوں نے یمن کی صورتحال پر سعودی عرب کے مؤقف کی حمایت کرنے پر پاکستان سے اظہار تشکر کیا جبکہ دہشت گرد عناصر کے خاتمے کیلئے پاکستانی کوششوں کی بھی تعریف کی۔