ڈیرہ غازی خان (آئی این پی ) ڈیرہ غازی خان میں پولیس اور حساس اداروں نے مشترکہ کارروائی کرتے ہوئے دو دہشتگردوں کو مقابلے کے بعد ہلاک کردیا۔ دونوں دہشتگردوں کا تعلق کالعدم تنظیم سے تھا۔ڈیرہ غازی خان کے علاقے تھانہ سخی سرور کی حدود میں دہشتگردوں کے کیمپ پر پولیس اور قانون نافذ کرنے والے اداروں نے مشترکہ کارروائی کی۔ پولیس کو دیکھتے ہی دہشتگردوں نے پولیس پارٹی پر فائرنگ شروع کر دی۔ تاہم جوابی فائرنگ میں دونوں دہشتگرد مارے گئے۔ پولیس کے مطابق مقابلے میں ہلاک ہونیوالے دونوں دہشتگردوں کاتعلق کالعدم تنظیم الحرار سے ہے اور دونوں کی شناخت کریم اور صفدر کے ناموں سے ہوئی ہے۔ پولیس کا کہنا ہے دہشتگردوں کے کیمپ سے خود کش جیکٹس، ہینڈگرنیڈز، اور بھاری تعداد میں اسلحہ برآمد ہوا ہے۔