گوجرانوالہ (نمائندہ خصوصی) کٹی پتنگ پکڑتے ہوئے بجلی کی تا روں سے کرنٹ لگنے سے فرسٹ ائیر کا طالب علم جاں بحق ہوگیا۔ تفصیلات کے مطابق کھوکھرکی کا رہائشی فرسٹ ائیر کا طالب علم احسن اپنی چھت پر کھڑا تھا، اس دوران اس نے کٹی ہوئی پتنگ پکڑی جو قریب سے گذرنے والی بجلی کی ہائی وولٹیج تاروں پر گر گئی۔ کرنٹ لگنے سے اسکی حالت انتہائی تشویشناک ہوگئی، اسے طبی امداد کیلئے ڈسٹرکٹ ہسپتال منتقل کیا جا رہا تھا لیکن وہ راستے میں ہی جان کی بازی ہار گیا۔ ہسپتال انتظامیہ نے نعش ضروری کارروائی کے بعد ورثاء کے حوالے کردی۔ نعش جب گھر پہنچی تو لواحقین اپنے لخت جگر کی نعش سے لپٹ کر روتے رہے۔