خانقاں ڈوگراں، شیخوپورہ، کھچی والا، قصور، لاہور، ٹھٹھہ، بہاولپور (نامہ نگاران + نامہ نگار خصوصی + خصوصی رپورٹر + آئی این پی) خانقاہ ڈوگراں، کھچی والا، قصور، بہاولپور، ٹھٹھہ میں ٹریفک حادثات، ایک ہی خاندان کے 4 افراد سمیت 16 افراد جاں بحق ہوگئے۔ تفصیلات کے مطابق خانقاہ ڈوگراں کے قریب موٹروے پر کار سامنے جانے والے مزدا ٹرک کی نیچے گھس گئی جس سے کار میں سوار اویس ظفر، اذان ظفر، سیما اویس اور مہک موقع پر ہی جاں بحق ہو گئے جبکہ کار ڈرائیور کامران شدید زخمی ہو گیا۔ پولیس نے مزدا ڈرائیور کو گرفتار کر کے حوالات میں بند کر دیا۔ پولیس ذرائع کے مطابق لاہور سے تعلق رکھنے والی کار سوار فیملی مری سیر سے واپس آ رہی تھی خانقاہ ڈوگراں انٹر چینج کے قریب گفتگو میں مصروف ہونے کی بنا پرگاڑی ڈیوائیڈر سے ٹکر ا کر اپنا بیلنس برقرار نہ رکھ سکی اور سامنے جاتے ہوئے مزد ا ٹرک کے نیچے جا گھسی جس سے بدقسمت فیملی کے سارے افراد موقع پر ہی جاں بحق ہو گئے اور ڈرائیور زخمی ہو گیا۔ زخمی اور نعشوں کو شیخوپورہ ہسپتال منتقل کر دیا گیا۔ وزیراعلیٰ شہباز شریف نے موٹروے پر ٹریفک حادثے میں ایک ہی خاندان کے 4 افراد کے جاں بحق ہونے کے واقعہ پر دکھ اور افسوس کا اظہار کیا ہے۔ وزیراعلیٰ نے حادثے میں جاں بحق افراد کے لواحقین سے ہمدردی اور تعزیت کا اظہار کیا ہے۔شیخوپورہ سے نامہ نگارخصوصی کے مطابق موٹروے انٹرچینج خانقاہ ڈوگراںکے قریب اسلام آباد سے لاہور جانیوالی کار کی ٹرک سے ٹکر کار میں سوار میاںبیوی دو بچوں سمیت جاںبحق جبکہ ایک بچہ معجزانہ طور پر بچ گیا۔ علاوہ ازیںفیصل آباد روڈ کے قریب ایک تیز رفتار ٹرک کی موٹرسائیکل سے ٹکر بہن بھائی موقع پر جاں بحق جبکہ ایک بچہ شدید زخمی ہوگیا۔ فیصل صدیق اپنی ہمشیرہ کے ہمراہ بھکھی کے قریب سڑک کنارے موٹرسائیکل پرکھڑا تھا کہ عقب سے آنیوالا تیز رفتار ٹرک بے قابو ہوکر ان سے ٹکراتا ہوا قریبی پیپر مل کا گیٹ توڑکر اندر داخل ہوگیا اس سے موٹرسائیکل سوار بہن بھائی موقع پر جاں بحق ہوگئے ٹریفک کے تیسرے حادثہ میں لاہور روڈ منڈیالی کے قریب ایک مسافر ویگن تیزرفتاری کے باعث الٹ گئی جس میں سوار15مسافر شدید زخمی ہوگئے جن کو ڈی ایچ کیوہسپتال داخل کروادیا گیا ہے۔ قصور سے نامہ نگار اور نمائندہ نوائے وقت کے مطابق پھولنگر ملتان روڈ گڑیالہ ولٹویا کے قریب ٹریفک حادثہ میں ماں بیٹا جاں بحق اور اس کا قریبی عزیز شدید زخمی ہو گیا جسے طبی امداد کیلئے سول ہسپتال پتو کی پہنچا دیا گیا ہے۔ موٹر سائیکل سوار علی رضا اپنی بھابھی پروین بی بی اور بھتیجے 3سالہ سمیع اللہ کو لیکر کوٹ اکبر سے پتو کی کی جانب جا رہا تھا کہ جب وہ گڑیالہ ولٹویا کے قریب پہنچا تو علی رضا کی بھابھی پروین بی بی کا ڈوپٹہ موٹر سائیکل کے چین میں پھنس گیا، پیچھے سے آنے والے تیز رفتار ٹرک ڈرائیور نے ٹرک ان کے اوپر چڑھا دیا جس کے نتیجہ میں پروین بی بی اور اس کا تین سالہ بیٹا سمیع اللہ موقع پر جاں بحق ہوگئے۔ پولیس تھانہ پتو کی نے مقدمہ درج کر لیا ہے۔علاوہ ازیں کھچی والا دربار بابا فضل شاہ کے سامنے دو موٹر سائیکل تیزرفتاری کی وجہ سے آپس میں ٹکرا گئے اسی دوران پختہ اینٹوں سے لوڈ ٹریکٹر ٹرالی نے ان کوکچل دیا،چک 209/9-R کے رہائشی محمد بلال، ان کے عزیز سجاد مو قع پر جاں بحق ہو گئے جبکہ محمد طالب شدید زخمی ہو گیا۔ ادھر ٹھٹھہ کے علاقے چوہڑ جمالی میں باراتیوں کی بس الٹ گئی۔ حادثے کے نتیجے میں 4 افراد جاں بحق اور 6 زخمی ہو گئے، جاں بحق ہونیوالوں میں دو خواتین اور ایک بچہ بھی شامل ہے۔ بہاولپور سے نامہ نگار کے مطابق بائی پاس خانقاہ شریف بہاولپور کے نزدیک منی کوچ اُلٹنے سے 2 افراد جاں بحق جبکہ 14 زخمی ہو گئے۔ زخمیوں کو بہاول وکٹوریہ ہسپتال منتقل کر دیا گیا۔