لاہور(نامہ نگاران) لوڈشیڈنگ کا سلسلہ گزشتہ روز بھی جاری رہا جس کے باعث لوگوں کو مشکلات کا سامنا کرنا پڑا۔ حافظ آباد میں لوگ سراپا احتجاج بن گئے۔ پاک پتن سے نامہ نگار کے مطابق شہر اور گردونواح میں غیراعلانیہ لوڈشیڈنگ سے کاروبار زندگی بُری طرح مفلوج ہو گیا۔ علاوہ ازیں گیس کی طویل بندش رہی جس پر شہری سراپا احتجاج بن گئے۔ شور کوٹ سے نامہ نگار کے مطابق بجلی کی غیراعلانیہ لوڈشیڈنگ کا سلسلہ بھی جاری ہے جس کی وجہ سے کاروبار زندگی بُری طرح مفلوج ہو کر رہ گیا۔حافظ آباد سے نمائندہ نوائے وقت کے مطابق گذشتہ روز بجلی کی سپلائی مسلسل10گھنٹے معطل رہی ۔جس سے شہریوں کو شدید پریشانی اور مشکلات کا سامنا رہا۔ شہریوں نے واپڈہ کے خلاف بجلی کی غیر اعلانیہ طویل بندش پر شدید احتجاج کرتے ہوئے کہا کہ بجلی کی آئے روز بندش سے نہ صرف انکے کاروبار متاثر ہورہے ہیں بلکہ اس سے انہیں زہنی کوفت کا بھی سامنا کرنا پڑ رہا ہے۔