لاہور (اے پی پی) قومی ویمن کرکٹ ٹیم دورہ ویسٹ انڈیز کے لئے آج ہفتہ کی علی الصبح کپتان ثناءمیر کی قیادت میں ویسٹ انڈیز روانہ ہوگی۔ دورے کے دوران چار ون ڈے اور تین ٹی 20 انٹرنیشنل میچز پر مشتمل سیریز کھیلے گی۔ سیریز کے چار ون ڈے میچوں میں سے تین ون ڈے میچز آئی سی سی ویمن ون ڈے چیمپئن شپ کا حصہ ہیں جو کہ 2017 کو انگلینڈ میں ہونے والے ورلڈ کپ کا کوالیفائر ہے۔ دورہ ویسٹ انڈیز سے واپسی پر ویمن ٹیم یو ایس اے سی اے کی دعوت پر ویمن کرکٹ کے فروغ کے لئے امریکہ کا دورہ کرے گی اور فلوریڈا میں دو دوستانہ ٹی 20 میچز کھیلے گی۔دریں اثناء قومی ویمن کرکٹ ٹیم کی مینجر عائشہ اشعر نے کہا ہے کہ بنگلہ دیش کی ویمن کرکٹ ٹیم کے خلاف سیریز جیتنے سے قومی ویمن ٹیم کا مورال بلند ہے اور ٹیم دورہ ویسٹ انڈیز کے دوران بھی اچھی پرفارمنس کا مظاہرہ کرکے بہترین نتائج حاصل کرے گی۔ انہوں نے کہاکہ ویسٹ انڈیز کی ٹیم کا فی مضبوط ہے اور ان کی رینکنگ بھی ہم سے زیادہ ہے لیکن قومی ٹیم دنیا کی ہر ٹیم کو شکست دینے کی صلاحیت رکھتی ہے۔ ماضی میں بھی ویسٹ انڈیز کے خلاف اچھی کارکردگی کا مظاہرہ کیا۔