سڈنی (اے پی پی) میٹاڈور ون ڈے کپ، کوئنز لینڈ نے وکٹوریہ کو 29 رنز سے ہرا دیا۔ وکٹوریہ کی ٹیم 210 رنز کا ہدف حاصل کرنے میں ناکام رہی اور180 پر ڈھیر ہوگئی۔ گزشتہ روز سڈنی میں کھیلے گئے ٹورنامنٹ کے چھٹے میچ میں کوئنزلینڈ نے پہلے بیٹنگ کرتے ہوئے مقررہ 50 اوورز میں 209 رنز بنائے۔ پیٹر فوریسٹ 57 اور نیتھن ریئرڈن 42 رنز کے ساتھ نمایاں رہے۔ جیمز پیٹنسن نے چار جبکہ جان ہیسٹنگز اور گلین میکسویل نے دو، دو وکٹیں حاصل کیں۔ وکٹوریہ کی ٹیم مطلوبہ ہدف حاصل کرنے میں ناکام رہی اور پوری ٹیم 41 اوورز میں 180 رنز بناکر آﺅٹ ہوگئی۔ کپتان میتھیو ویڈ 56 اور جیمز پیٹنسن 44 رنز کے ساتھ نمایاں رہے۔ جیمز ہوپس، مارک سٹیکٹے، بین کٹنگ اور مائیکل نیسر نے دو، دو وکٹیں حاصل کیں۔ جیمز پیٹنسن کو مرد میدان قرار دیا گیا۔