لاہور (این این آئی) الیکشن کمشن کی طرف سے ووٹر لسٹوں میں بے شمار غلطیوں کی وجہ سے سمن آباد اور دیگر علاقوں کے سینکڑوں ووٹر ووٹ کاسٹ کرنے سے محروم رہ گئے جبکہ سمن آباد کے سینکڑوں ووٹروں کے پولنگ سٹیشن حلقہ کے دور دراز علاقوں میں بنانے سے بھی ووٹر خوار ہو گئے۔ الیکشن کمشن کی طرف سے ایک طرف تو این اے 122 کے ضمنی انتخاب کو شفاف بنانے کیلئے سخت انتظامات کرنے کا دعویٰ کیاگیا تھا‘ لیکن اس کے ساتھ این اے 122 کے سینکڑوں ووٹروں کا پولنگ سٹیشن دور دراز علاقوں میں بنا دیا گیا۔ الیکشن کمشن پر موبائل فون ایس ایم ایس سروس 8300 پر شناختی کارڈ اندراج کرنے پر ووٹر کے پولنگ سٹیشن کے حوالے سے نامکمل تفصیلات کی وجہ سے ووٹر خوار ہوکر رہ گئے۔ ایک پولنگ سٹیشن سے دوسرے پولنگ سٹیشن پر جا کر اپنا ووٹ تلاش کرتے رہے۔