ابوظہبی (اے این این ) انگلینڈ کرکٹ ٹیم کے بائولر جیمز اینڈریسن نے کہاہے کہ وہ پاکستان کے خلاف کھیلے جانے والے پہلے ٹیسٹ میچ کا بے صبری سے انتظار کررہے ہیں ۔ ایک غیر ملکی خبر رساں ادارے سے بات چیت کرتے ہوئے انہوںنے کہاکہ انجری سے صحت یابی کے بعد انہیں پوری امید ہے کہ وہ انٹرنیشنل کرکٹ میں بھر پور انداز میں کم بیک کریں گے ۔ انہوںنے کہاکہ پاکستان کے خلاف ٹیسٹ سیریز مشکل ضرور ہے تاہم انگلینڈ کی ٹیم میں یہ صلاحیت موجود ہے کہ وہ پاکستان کو یو اے ای کی سرزمین پر شکست سے دوچار کرسکے۔انہوںنے کہاکہ انگلینڈ کی سرزمین پر آسٹریلیاکے خلاف کھیلی جانے والی ٹیسٹ سیریز کے میچز سے آئوٹ ہونے پر افسوس ہے لیکن اس دوران وہ کائونٹی کرکٹ ضرور کھیلتے ر ہے ہیں جس کا فائدہ انہیں پاکستان کے خلاف سیریز میں ضرور ہوگا ۔ خیال رہے کہ انگلینڈ کی ٹیم اس وقت یو اے ای کے دورہ پر ہے جہاں پر دونوں ٹیموں کے مابین تین ٹیسٹ میچز پر مشتمل سیریز کھیلی جائے گی ۔