ڈسکہ + گوجرانوالہ (نامہ نگار+نمائندہ خصوصی) نامعلوم افراد نے 13 گدھوں کو چوری کر لیا اور کھالیں اتار لیں۔گذشتہ رات تھانہ بمبانوالہ کے علاقہ کوٹ مستا کے رہائشیوں زاہد اقبال، محمد مالک، محمد یعقوب، اعظم، محمد منیر، محمد اسلم اور محمد نذیر کے ڈیروں سے ایک ایک جبکہ نور حسن، غلام دستگیر کے ڈیرہ سے دو دو اور قدیر کے ڈیرہ سے تین عدد اور مجموعی طور پر 13عدد گدھوں کو نامعلوم چوروں نے ایک ہی رات میں چرا کر ان کی کھالیں اتار کر گوشت اور باقیات نہر اپر چناب کنارے پھینک کر کھالیں لیکر فرار ہو گئے۔ مالکان اور اہل علاقہ میں پریشانی کی لہر دوڑ گئی۔ تھانہ بمبانوالہ پولیس مقدمہ درج کر کے مصروف تفتیش ہے۔گوجرانوالہ سے نمائندہ خصوصی کے مطابق کوٹ مستا میں چور محنت کش قدیر، اشتیاق ابوبکر، اللہ دتہ سمیت دیگر افراد کے 13 گدھے لے کر فرار ہوگئے۔ متاثرہ محنت کش روزگار چھن جانے پر گاؤں کے چودھری طارق کے پاس فریاد لے کر گئے اور پولیس کی جانب سے کارروائی عمل میں لائے جانے پر شدید تحفظات کا اظہار کیا۔