جھنگ (نامہ نگار) وزیراعظم محمد نوازشریف نے گیس کی بنیاد پر لگنے والے1230 میگاواٹ کے حویلی بہادر شاہ پاور پلانٹ کی تعمیر کا سنگ بنیاد رکھنے کی تقریب سے خطاب کرتے ہوئے وزیراعلیٰ پنجاب محمد شہبازشریف کی کارکردگی اور شبا نہ روز محنت کی تعریف کرتے ہوئے کہاکہ میں انہیں تھپکی کے ساتھ شاباش بھی دیتا ہوں کیونکہ وہ کام کا پیچھا کرتے ہیں اور پایہ تکمیل تک پہنچا کر دم لیتے ہیں- وزیراعظم نے کہاکہ وزیراعلیٰ محمد شہبازشریف نے توانائی منصوبوں کو آگے بڑھانے میں ذاتی طور پر دلچسپی لی ہے اور انتہائی محنت کے ساتھ کام کیاہے بلاشبہ شہبازشریف مبارکباد کے ساتھ شاباش کے بھی مستحق ہیں کیونکہ وہ دیوانہ وار منصوبوں کی شفاف اوراعلیٰ معیار کے ساتھ تکمیل کے لئے دن رات ایک کئے ہوئے ہیں -وزیراعظم نے دیہی علاقوں میں سڑکوں کی تعمیر و بحالی کے منصوبے کو بھی دیہی آبادی کیلئے ایک سنگ میل قرار دیتے ہوئے کہاکہ اس پر بھی وزیراعلیٰ محمدشہبازشریف کو مبارکباد اور شاباش دیتا ہوں- یہ منصوبہ دیہی معیشت کی ترقی کے لئے انتہائی اہمیت کا حامل ہے-