سلطان آف جوہر ہاکی کپ پاکستانی ٹیم فتح کو ترس گئی،ملائیشیا نے آخری میچ میں 3-1 سے ہرا دیا
لاہور( نمائندہ سپورٹس) پانچویں سلطان آف جوہر جونیئر ہاکی کپ میں پاکستانی ٹیم فتح کو ترس گئی، آخری میچ میں میزبان ملائیشین ٹیم نے گرین شرٹس کو 3-1 گولز سے زیر کیا۔ ملائیشیا میں جاری ایونٹ میں ہفتے کو کھیلے گئے آخری میچ میں پاکستان کا مقابلہ میزبان ٹیم سے تھا، ملائیشین ٹیم نے عمدہ کارکردگی کا مظاہرہ کرتے ہوئے گرین شرٹس کو ایک کے مقابلے میں تین گولز سے زیر کر کے ایونٹ میں دوسری کامیابی سمیٹی، یہ پاکستانی ٹیم کی ایونٹ میں چوتھی شکست تھی جبکہ گرین شرٹس نے برطانیہ کے خلاف میچ ڈرا کھیلا تھا۔ پاکستانی ٹیم پانچویں پوزیشن کیلئے آج اتوار کو آسٹریلیا کے مدمقابل ہو گی۔
