لاہور (سپورٹس رپورٹر) پانچواں سلطان آف جوہر جونیئر ہاکی ٹورنامنٹ برطانیہ نے بھارت کو فائنل میں شکست دیکر جیت لیا جبکہ تیسری اور چوتھی پوزیشن کے میچ میں میزبان ملائیشیا نے ارجنٹینا کو ہرا کر وکٹری سٹینڈ تک رسائی حاصل کی۔ ٹورنامنٹ کی فیئر پلے کی ٹرافی آسٹریلیا کو دی گئی۔ پانچویں سلطان آف جوہر جونیر ہاکی ٹورنامنٹ میں پاکستان ٹیم درجہ بندی کے میچ میں بھی آسٹریلیا کے ہاتھوں شکست کھا گئی۔ پاکستان جونیئر ٹیم کو آسٹریلیا کے ہاتھوں پانچ صفر سے شکست کا سامنا کرنا پڑا۔ اس سے قبل لیگ میچ میں آسٹریلیا نے پاکستان ٹیم کو چھ دو سے مات دی تھی۔ ٹورنامنٹ میں پاکستان ٹیم کی کارکردگی انتہائی مایوس کن رہی پاکستان ٹیم نے ٹورنامنٹ کے چھ میچوں میں صرف پانچ گول سکور کیے جبکہ اس کے خلاف حریف ٹیموں نے 22 گول سکور کئے۔