ٹیکساس (نیٹ نیوز) امریکہ میں جس مسلم طالبعلم کی بنائی گھڑی کو ٹیچر نے بم سمجھ کر اسے گرفتار کرا دیا تھا گزشتہ روز اس طالب علم محمد احمد نے وائٹ ہائوس کا دورہ کیا اور صدر اوباما سے ملاقات کی۔ ٹیکساس کے محمد احمد کو وائٹ ہائوس کے دورے کی دعوت صدر اوباما نے دی تھی۔ امریکی صدر نے اب سماجی رابطے کی ویب سائٹ پر محمد احمد کا نام لئے بغیر لکھا کہ پرتجسس نوجوانوں کی حوصلہ افزائی کرنی چاہئے ان کی صلاحیتوں کو دبانا نہیں چاہئے۔ محمد احمد پچھلے ماہ گھڑی بنا کر سکول لے گیا تھا مگر ٹیچر نے اسے ٹائم بم سمجھ کر گرفتار کرا دیا تھا۔ ناسا کی ٹی شرٹ پہنے اس کی ویڈیو منظر عام پر آئی تو امریکہ بھر میں غم و غصے کی لہر دوڑ گئی تھی۔