راولپنڈی (این این آئی) جامع مسجد روڈ پر گیس سلنڈر کے دھماکے سے ایک خاتون سمیت چار افراد جھلس گئے۔ ریسکیو 1122 کے مطابق جامع مسجد روڈ پر لاثانیہ میرج ہال کے قریب ایک گھر میں گیس سلنڈر سے لیکیج کے باعث اچانک دھماکہ ہو گیا جس کے نتیجے میں ایک خاتون اور تین مرد جھلس گئے جنہیں فوری طور پر ہولی فیملی ہسپتال منتقل کردیا گیا۔ ذرائع کا کہنا ہے کہ اتوار کی صبح آٹھ بجے کے قریب جامع مسجد روڈ کے ایک گھر میں رہائش پذیرتصویر عباس شاہ کی اہلیہ 25 سالہ ہما نے سلنڈر سے منسلک چولہا جلانے کیلئے دیاسلائی روشن کی تو اچانک آگ بھڑک اٹھی جس کے باعث ہما، تصویر شاہ 3 سالہ توصیف اور 26 سالہ وسیم جھلس گئے۔ اہل محلہ کا کہنا ہے کہ سوئی گیس پریشر میں کمی کے باعث لوگ گیس سلنڈر کے استعمال پر مجبور ہیں جس کی وجہ سے یہ افسوسناک واقعہ پیش آیا۔