بینظیر انکم سپورٹ پروگرام گزیٹڈ پوسٹوں پر 40 ڈیپوٹیشن افسر تعینات
اسلام آباد(آن لائن) تنزلی اور ابتری کا شکار ادارے بے نظیر انکم سپورٹ پروگرام (بی آئی ایس پی) میں بھاری معاوضوں کے عوض ڈیپوٹیشن پر گزیٹڈ پوسٹوں40 پر افسران کو تعینات کرنے کا انکشاف ہوا ہے ۔ معتبر ذرائع نے آن لائن کو بتایا ہے کہ بی آئی ایس پی کی انتظامیہ نئے پروگرام تو شروع کرنا دور کی بات ہے اکثر پرانے پروگرام بھی بند کر رہی ہے جبکہ دوسری جانب انتظامیہ من پسند اور منظور نظر افراد کو بھی نواز ر ہی ہے اور گزشتہ تین ماہ کے قلیل عرصہ میں چالیس گزیٹڈ افسران کو بھاری معاوضوں پر ڈیپوٹیشن پر تعینات کیا گیا ہے ۔ آن لائن کو ذرائع نے بتایا کہ بی آئی ایس پی کی انتظامیہ نے اس پر بس نہیں کیا بلکہ اکتوبر کے آخر میں چند دن قبل مزید 80 افسران کا دیگر محکموں سے انتخاب کرلیا ہے جن کو بی آئی ایس پی میں پرکشش عہدوں پر بھاری معاوضوں کے عوض ڈیپوٹیشن پر تعینات کیا جائے گا۔
