ملتان (آئی این پی + آن لائن) ملتان میں 50 مرد و خواتین ڈاکوئوں کا الیکٹرانکس کی دکان پر دھاوا ، سارا سامان لوٹ لیا۔ ڈاکوئوں میں خواتین بھی اسلحے سے لیس تھیں جنہوں نے دیکھتے ہی دیکھتے ہی دکان کا سارا سامان لوٹ لیا۔ نجی ٹی وی پر سی سی ٹی وی فوٹیج میں دیکھا جا سکتا ہے کہ لوگوں کی بڑی تعداد دکان میں گھس گئی اور جس کے ہاتھ جو لگا اٹھا کر لے گئے۔ تاجروں نے بھرپور احتجاج کرتے ہوئے سڑکوں کو ٹریفک کے لیے بند کر دیا اور پولیس کے خلاف بھرپور نعرے بازی کی۔ علاوہ ازیں ایک اور واردات میں کمسن بہن بھائی دکان سے لیپ ٹاپ لے اڑے، چوری کی سی سی ٹی وی فوٹیج منظر عام پر آگئی۔ میڈیا رپورٹس کے مطابق ملتان شہر میں گزشہ روز 2کمسن بہن بھائیوں جن کی عمریں 6 اور 8 سال ہیں کو ایک دکان سے لیپ ٹاپ چوری کرتے ہوئے دیکھا گیا ہے ، 6 سال کی لڑکی اور8 سال کا ایک لڑکا اپنے والد اور چچا کے ہمراہ ایک دکان میں داخل ہوئے اور تین منٹ کے اندر دکان سے لیپ ٹاپ چوری کرکے فرار ہوگئے۔ رپورٹ کے مطابق دونوں بچوں کو چوری کے لیے والد اور چچا کی سرپرستی حاصل ہے اور شہر میں ان بچوں کو چوری کی وارداتوں کے لیے استعمال کیا جا رہا ہے۔