لاہور (نمائندہ سپورٹس)سابق فاسٹ باؤلر عامر نذیر کا کہنا ہے کہ جونئیر کرکٹ میں کوکا بورا گیند استعمال کرنے کا فیصلہ اچھا ہے اس کے مسلسل استعمال سے مستقبل میں اچھے نتائج سامنے آئیں گے۔ بین الاقوامی سطح پر یہی گیند استعمال ہوتا ہے یہ بہتر ہے کہ ہمارے کھلاڑی انڈر نائینٹین کے لیول سے ہے اس گیند کے ساتھ کھیلنے میں مہارت حاصل کر لیں۔انہوں نے کہا نچلی سطح پر اب کوچز کی ذمہ داری میں بھی اضافہ ہو گا اس گیند کے مناسب استعمال کے حوالے سے جونئیر کرکٹرز کواچھی تربیت اور رہنمائی کی ضرورت ہو گی۔انہوں نے کہا کہ کرکٹ بورڈ کے اس فیصلے پر پی سی بی اور بورڈ کی کرکٹ کمیٹی کے ذمہ داران مبارکباد کے مستحق ہیں۔ عامر نذیر کا کہنا ہے کہ ملک میں جاری ڈومیسٹک سیزن میں اچھی پچز بن رہی ہیں ملک بھر کے تمام سینٹرز پر سپورٹنگ پچز جونئیر کرکٹ کے مقابلوں میں تیار کرکے ہم کوکا بورا گیند کے استعمال کے بہترین انداز میں فائدہ اٹھا سکتے ہیں۔