سکھر/ کندھ کوٹ (صباح نیوز) ڈاکوؤں کی فائرنگ سے دو افراد جاں بحق، 7 زخمی جبکہ سکھر میں پولیس مقابلے میں دو ڈاکو ہلاک اور دو فرار ہو گئے۔ تفصیل کے مطابق کندھ کوٹ میں ڈاکوؤں کی لوٹ مار میں ایک ڈرائیور اپنی جان سے گیا جبکہ چار زخمی ہوگئے۔ گزشتہ روزکندھ کوٹ کے علاقے بخش شاہ پور کے قریب ڈاکو ٹرک ڈرائیوروں سے لوٹ مار کر رہے تھے کہ اس دوران مزاحمت پر فائرنگ سے ایک ٹرک ڈرائیور جاں بحق اور چار زخمی ہوگئے۔ ڈاکو پولیس پارٹی پر فائرنگ کرتے ہوئے فرار ہوگئے۔ دوسری جانب کشمور کے قریب انڈس ہائی وے پر پشاور سے کراچی جانے والی کوچ پر ڈاکوؤں کی فائرنگ سے ایک مسافر جاں بحق جبکہ تین شدید زخمی ہو گئے۔ پولیس نے مقدمات درج کر کے تحقیقات شروع کر دی۔ ادھر پنوعاقل تھانہ کینٹ کی حدود میں پولیس مقابلے میں دو ڈاکو ہلاک اور دو فرار ہو گئے۔ ترجمان سکھر پولیس کے مطابق پنوعاقل تھانہ کینٹ کی حدود میں گوپانگ لنک روڈ پر واردات کی نیت سے کھڑے چار مسلح ڈاکوؤں کی اطلاع پر پولیس پارٹی نے موقع پر پہنچ کر پوچھ گچھ کرنا چاہی تو ملزمان نے فائرنگ شروع کردی جوابی فائرنگ میں دو ڈاکو موقع پر ہلاک جبکہ دو فرار ہو گئے۔ ہلاک ہونے والے ڈاکوؤں کی نعشیں متعلقہ ہسپتال پہنچا دی گئیں جبکہ فرار ڈاکوؤں کی تلاش جاری ہے۔