لاہور(سپورٹس رپورٹر) ڈویژنل اے گریڈ نیشنل باسکٹ بال چیمپئن شپ میں شرکت کے لیے لاہور ٹیم کا انتخاب دو روزہ ٹرائل میں کیا جائے گا جو 15 اور 16 نومبر کو گورنمنٹ کالج لاہور میں ہونگے۔ اس بات کا اعلان محمود بٹ نے گذشتہ روز کیا۔ ان کا کہنا تھا کہ ڈویژنل اے گریڈ نیشنل چیمپئن شپ یکم سے 5 دسمبر تک گورنمنٹ کالج یونیورسٹی میں ہوگی جس میں 8 ٹیمیں حصہ لیں گی۔ ٹیموں میں لاہور، ہزارہ، پشاور، حیدر آباد، سرگودھا، فیصل آباد، گوجرانوالہ اور ملتان شامل ہیں۔محمود بٹ کا کہنا تھا کہ ڈویژنل چیمپئن شپ پاکستان باسکٹ بال فیڈریشن کے سالانہ کیلنڈر کا حصہ ہے۔ لاہور ٹیم کے لیے بہترین کھلاڑیوں کا انتخاب کیا جائے گا۔ ٹرائلز میں سب کو شرکت کی دعوت دی گئی ہے۔