سجاول/ ٹھٹھہ (بیور و رپورٹ/ نامہ نگار) پی پی کے چیئرمین بلاول بھٹو زرداری نے کہا ہے کہ ٹھٹھہ اور سجاول اضلاع میں ان کے دورے کے موقع پر ریلی میں لاکھوں کی تعداد میں عوام کی شرکت شہید محترمہ بے نظیر بھٹو کے ویژن کی فتح ہے۔ مکلی بائی پاس پر مختصر خطاب میں انہوں نے کہاکہ 19 نومبر کو دونوں اضلاع کے عوام یہ ثابت کردیں گے کہ وہ پیپلزپارٹی کے ساتھ ہیں ۔ اس دن ہمارے مخالفین کو تاریخی شکست ہوگی۔ چیئرمین کی ٹھٹھہ آمد پر ہزاروں افر اد شہر کی سڑکوں پر نکل آئے۔ بلند آواز میں پی پی کے نعرے لگاتے رہے۔ اس موقع پر سکیورٹی کے سخت انتظامات کئے گئے تھے۔ اس موقع پر قیادت کے ساتھ دو صوبائی وزیر ناصر شاہ، نثار کھوڑو، شہلا رضا بھی شامل تھے۔ سجاول سے نامہ نگار کے مطابق پیپلزپارٹی کے چیئرمین بلدیاتی انتخابات کے سلسلے میں ہیلی کاپٹر کے ذریعے نودوبان پہنچے جہاں سینئر صوبائی وزیر نثار کھوڑو ، سندھ اسمبلی کی ڈپٹی سپیکر شہلا رضا ، صوبائی وزیر محمد علی خان ملکانی، پی پی ضلع صدر ارباب وزیر میمن، سابق صوبائی وزیر غلام قادر ملکانی، ایم پی اے ریحانہ لغاری، سابق ایم پی اے سید شفیق شاہ بخاری نے استقبال کیا او رسینکڑوں گاڑیوں کے قافلے میں لایا گیا جس کے دوران گیٹ جاکھڑا، حاجیا موری، پبلک پارک چوک سجاول، پتن ناکہ، بیراج موری، دم دموں او رپٹھان کالونی تک راستوں میں ہزاروں افراد نے والہانہ استقبال کیا ۔ مختلف جگہوں پر بلاول بھٹوزرداری نے گاڑی سے باہر نکل کر کارکنان ا و رعوام کے نعروں کا جواب دیا۔