کراچی (کرائم رپورٹر) کراچی کے مختلف علاقوں میں منگل کو فائرنگ کے واقعات میں تاجر ہلاک اور اس کے ملازم سمیت چار افراد زخمی ہوگئے۔ چونے کے تاجر 55 سالہ سردار کو منگل کی صبح کورنگی میں مچھلی موڑ پر اس وقت فائرنگ کا نشانہ بنایا گیا جب وہ اپنے دو ملازمین کامران اور نعیم کے ہمراہ ہائی روف میں فیکٹری جا رہا تھا۔ ادھر کورنگی کراسنگ پر مسلح افراد نے خواجہ سرا 30 سالہ شمائلہ کو فائرنگ کرکے زخمی کر دیا جبکہ ناظم آباد کے علاقے یار محمد کالونی میں مسلح افراد کی فائرنگ سے دو افراد 40 سالہ محمد یوسف اور50 سالہ مختار زخمی ہوگئے۔ دوسری طرف رینجرز نے کراچی کے مختلف علاقوں میں کارروائیوں میں 27ملزم گرفتار کرکے اسلحہ برآمد کر لیا۔ ترجمان رینجرز کے مطابق ملزموں میں سیاسی جماعت سے تعلق رکھنے والے بھتہ خور اور گینگ وار کے کارندے بھی شامل ہیں۔ ملزمان کو ناردرن بائی پاس، آنسو گوٹھ، بزنس روڈ، بھٹائی آباد، عیسیٰ گوٹھ میں گرفتار کیا گیا۔