آل پاکستان رینکنگ بیڈمنٹن ٹورنامنٹ ما حورخضری فائنل میں پہنچ گئیں
لاہور(سپورٹس رپورٹر) ماحور شہزاد اور خضریٰ رشید نے آل پاکستان رینکنگ بیڈمنٹن ٹورنامنٹ کے فائنل کیلئے کوالیفائی کرلیا، سارہ مہمند جونیئر کھلاڑی کے ہاتھوں شکست کے خوف سے پہلے سیٹ میں مقابلہ ادھورا چھوڑ کر چلی گئیں جبکہ دوسرے سیمی فائنل میں خضریٰ رشید نے صائمہ وقاص کو ہرا دیا۔ پاکستان بیڈمنٹن فیڈریشن کے زیراہتمام نیوخان ہال میں جاری چیمپئن شپ کے تیسرے روز سنگل کیٹگری کے پہلے سیمی میں فائنل ماحور شہزاد نے سارہ مہمند کوشکست دیکر فائنل میں جگہ بنائی دونوں کھلاڑیوں کے درمیان میچ کا پہلا سیٹ جاری تھا کہ سارہ مہمند کو ابھرتی ہوئی نوجوان کھلاڑی ماحور کے ہاتھوں واضح دکھائی دیتی شکست کو دیکھ کر میچ کو ادھورا چھوڑ کر چلی گئیں دوسرے سیمی فائنل میں خضریٰ رشید نے صائمہ وقاص ہراکر فائنل کیلئے کوالیفائی کیا۔ گرلز ڈبلز کیٹگری میں صائمہ وقاص اور فرزانہ علی نے سحرا اکرم اور سعدیہ ارشد کو ہرایا جبکہ دوسرے سیمی فائنل میں سدرہ حمید اور خضریٰ رشید نے ماحور شہزاد اور غزالہ طارق کو شکست دیکر فائنل کیلئے کوالیفائی کیا۔ مردوں کی سنگل کیٹگری میں مراد علی نے عبدالرحمان کو جبکہ دوسرے سیمی فائنل میں عرفان سعید نے اویس زاہد کو ہراکر فائنل کیلئے کوالیفائی کیا۔ ٹورنامنٹ کے فیصلہ کن میچز آج کھیلے جائیں گے۔
