اوکاڑہ (نامہ نگار) گھریلو ناچاقی پر بیوی نے سوئے ہوئے خاوند پر پٹرول چھڑک کر آگ لگا دی، تشویشناک حالت میں ہسپتال منتقل کردیا گیا۔ نواحی قصبہ اڈا نول پلاٹ کا ظفر اقبال بیوی شمشاد بی بی کے ہمراہ فیصل آباد روڈ نزد پاک میرج ہال رہائش پذیر تھا۔ دونوں میاں بیوی میں گھریلو ناچاقی پر لڑائی جھگڑا رہتا تھا۔گزشتہ رات ظفر اقبال اپنے گھر میں سویا ہوا تھا کہ اُس کی بیوی نے موقع پاکر اُس پر پٹرول چھڑک کر آگ لگا دی اور باہر نکل کر کمرے کی کنڈی لگا دی۔ ظفر اقبال نے آگ لگنے سے اپنے آپ کو بچانے کیلئے شور کیا تو اہل محلہ نے کمرے کی کنڈی کھولی مگر اس وقت تک ظفر اقبال بری طرح جھلس چکا تھا۔ اسے تشویشناک حالت میں ہسپتال منتقل کردیا۔ ظفر اقبال کے بھائی ثناء اللہ کی درخواست پر شمشاد بی بی اور دو نامعلوم ملزمان کے خلاف اقدام قتل کا مقدمہ درج کرلیا ہے۔ اس نے الزام لگایا ہے کہ ملزمہ اس سے پہلے بھی اُس کے بھائی کو نشہ آور گولیاں کھلا کر مار دینے کی کوشش کر چکی ہے۔