بھکر (نامہ نگار) کلورکوٹ میں معمولی جھگڑے پر ایک دوست نے اپنے گہرے دوست کو قتل کرنے کے بعد خودکشی کرلی۔ دونوں کی نعشیں گھر پہنچنے پر کہرام مچ گیا۔ علاقے کی فضا سوگوار ہو گئی ہر آنکھ اشکبار ہوگئی۔ واقعات کے مطابق گزشتہ روز دو دوست زین ولد عنایت اللہ عمر تقریباً 22 برس، شہزاد گل ولد عطاء محمد عمر تقریباً 21 برس سکنہ ملانہ تحصیل کلورکوٹ آپس میں گپ شپ کررہے تھے اچانک شہزاد گل نے اپنے دوست زین پر فائر کھول دیا زخموں کی تاب نہ لاتے ہوئے موقع پر ہی موت کی نیند سو گیا جبکہ اپنے دوست کی موت پر گولی مارنے والے شہزاد گل نے اسی پستول سے خود کو گولی مار لی۔ قاتل شہزاد گل کو انتہائی تشویشناک حالت میں ڈسٹرکٹ ہیڈ کوارٹر ہسپتال بھکر لایا گیا تو ہسپتال کی سیڑھیوں پر ہی زخموں کی تاب نہ لاتے دم توڑ گیا۔ دو نوجوانوں کی نعشوں سے ان کے پیارے لپٹ کر دھاڑیں مار مار کر روتے رہے۔