لاہور (کامرس رپورٹر) سوئی ناردرن گیس پائپ لائن کمپنی نے پنجاب بھر میں سی این جی سیکٹر کیلئے گیس کی فراہمی ایک بار پھر بند کر دی۔ سی این جی سٹیشنوں کو گیس کی فراہمی آج صبح 6 بجے سے بند کی گئی ہے۔ سوئی ناردرن گیس کمپنی کے ترجمان کے مطابق ایل این جی کی درآمد متاثر ہونے کے باعث گیس کا شارٹ فال بڑھ گیا ہے جس کی وجہ سے سی این جی سیکٹر کیلئے گیس کی فراہمی غیرمعینہ مدت کیلئے بند کی جا رہی ہے۔ ایل این جی کی درآمد بہتر ہو جانے پر سی این جی کو گیس کی فراہمی بحال کردی جائیگی۔ میدانی علاقوں میں بھی سردی کی شدت بڑھ جانے سے گیس کی طلب میں نمایاں اضافہ ہوا ہے جس کے باعث شارٹ فال بڑھ گیا دوسری جانب ایل این جی کی درآمد متاثر ہونے سے پیداوار میں کمی ہوئی ہے۔