اسلام آباد (سپیشل رپورٹ+ این این آئی) قائم مقام صدر میاں رضا ربانی نے رائل سعودی نیول فورسز کے کمانڈر وائس ایڈمرل عبداللہ ایس السلطان کو نشان امتیاز (ملٹری) کے ایوارڈ سے نوازا۔ انہیں یہ ایوارڈ حکومت پاکستان نے دونوں برادر ممالک کی نیول فورسز کے باہمی تعلقات میں اہم کردار ادا کرنے کی خدمات کے اعتراف کے طور پر دیا گیا ہے۔ ایوارڈ دینے کی تقریب ایوان صدر اسلام آباد میں منعقد ہوئی۔ تقریب میں پاک بحریہ کے سربراہ ایڈمرل محمد ذکاء اللہ، سعودی عرب کے پاکستان میں سفیر عبداللہ مرزوق الزہرانی بھی شریک تھے۔ قائم مقام صدر نے امید کا اظہار کیا کہ رائل سعودی نیول فورسز کے سربراہ مستقبل میں بھی دونوں ممالک کے تعلقات میں مزید بہتری کے لئے اقدامات میں دلچسپی لیتے رہیں گے۔