کراچی (نوائے وقت رپورٹ+آن لائن) پروٹو کول سے بچی کی جان جانے کے بعد بھی سائیں سرکار کو ہوش نہ آیا بلاول بھٹو زرداری کا پروٹوکول گزشتہ رات بھی عوام کو رلا گیا۔ نجی ٹی وی کے مطابق اپوزیشن لیڈر خورشید شاہ کے بیٹے کی شادی پر ڈیفنس میں کئی سڑکیں بند کر دی گئیں اس دوران وی آئی پی موومنٹ سے شہریوں کو مشکلات کا سامنا کرنا پڑا۔ شادی کی تقریب میں بلاول بھٹو زرداری، وزیر اعلیٰ قائم علی شاہ، صوبائی وزرائ، پی پی رہنمائوں نے شرکت کی جس کی وجہ سے پورا علاقہ سکیورٹی حصار میں تھا۔ پروٹوکول کے نام پر سپیشل برانج، ایس ایس یو کمانڈوز تعینات تھے۔نجی ٹی وی کے مطابق قائد حزب اختلاف خورشید شاہ کے بیٹے کی شادی کراچی کے علاقے ڈیفنس کے فیز 8 میں واقع ایک ہوٹل میں ہوئی۔ اس موقع پر سکیورٹی کے سخت انتظامات کئے گئے۔