لاہور (نامہ نگار) ریس کورس کے علاقہ سندر داس روڈ پر منگل اور بدھ کی درمیانی شب ڈاکوؤں کی فائرنگ سے جاں بحق ہونے والی حاملہ خاتون آمنہ کے بچے کو ڈاکٹروں نے بچا تو لیا ہے مگر ہسپتال میں نومولود بچے کی حالت تشویشناک بتائی جاتی ہے۔ اس کے علاوہ ڈاکوؤں کے سر پر پسٹل کے بٹ مارنے سے زخمی ہونے والے مقتولہ آمنہ کے شوہر میاں عثمان کو ہسپتال سے طبی امداد فراہم کرنے کے بعد فارغ کر دیا گیا۔ پولیس نے گذشتہ روز آمنہ کی نعش بھی پوسٹ مارٹم کے بعد ورثاء کے حوالے کر دی ہے جسے نماز جنازہ کے بعد مقامی قبرستان میں سپردخاک کر دیا گیا۔ اس موقع پر ہر آنکھ اشکبار تھی جبکہ پولیس تاحال ڈاکوؤں کا سراغ لگانے اور انہیں گرفتار کرنے میں ناکام رہی۔ پولیس کے مطابق تفتیش جاری ہے جلد ڈاکوؤں کو گرفتار کر لیا جائے گا۔