کراچی (سپورٹس رپورٹر) نیوری اور واپڈا نے 62ویں نیشنل ہاکی چیمپئن شپ میں اپنے میچز جیت لیے جبکہ پاکستان ریلوے اور پورٹ قاسم کا مقابلہ برابر رہا ۔ہاکی کلب آٖ پاکستان پر جاری چیمپئن شپ میں اتوار کو پاکستان نیوی نے پاکستان ائیر فورس کو بآ سانی یکطرفہ مقابلے کے بعد 7-0سے شکست دے دی، پاکستان واپڈا نے پاکستان کسٹمز کے خلاف ایک کے مقابلے میں تین گول سے کامیابی سمیٹی، پاکستان ریلوے اور اور پورٹ قاسم کا میچ دو، دو گول سے برابر رہا، اس میچ میں پورٹ قاسم کی ٹیم جسے اولمپئینز کاشف جواد اور شکیل عباسی کی خدمات حاصل تھی دو گول کے خسارے میں جانے کے بعد ہوش میں آ ئی اور میچ برابر کرنے میں کامیاب رہی، ریلوے کی جانب سے احمد ندیم نے 41 اور کپتان محمد عثمان نے 44ویں منٹ میں گیند کو جال میں اچھال کر ٹیم کو سبقت دلادی تھی جس کے بعد پورٹ قاسم کے کھلاڑی فارم میں آ گئے اور انہوں نے دو گول بناکر اپنی ٹیم کی شکست کو ٹال دیا، کاشف جواد اور زبیر نے ایک، ایک گول اسکور کیا، پاکستان نیوی اور ائیر فورس کا میچ یکطرفہ ثابت ہوا، پاکستان نیوی کی جانب سے اسد عزیز اور محسن صابر نے دو، دو گول اسکور کئے علی شیر، کامران آ صف اور ایس احمد نے ایک ایک گول اسکور کیا، پاکستان واپڈا نے پاکستان کسٹمز کے خلاف ایک کے مقابلے میں تین گول کی فتح کو گلے لگایا، واپڈا کی جانب سے 41ویں منٹ میں محمد عثمان نے پہلا گول اسکور کیا، دو منٹ بعد رانا عمیر نے اپنی ٹیم کی برتری کو دگنا کردیا کھیل کے 58ویں منٹ میں محمد شہباز نے اپنی ٹیم کا تیسرا گول بنایا، ایک منٹ بعد پاکستان کسٹمز کی جانب سے عاصم خان اپنی ٹیم کا واحد گول اسکور کرنے میں کامیاب ہوئے، چیمپئن شپ میں آج کے میچوں کے بعدکوارٹر فائنل لائن اپ مکمل ہوجائے گی ۔آج پی ٹی وی کا مقابلہ پاکستان اسٹیل سے اور این بی پی کا مقابلہ ائیر فورس سے ہوگا۔