لاہور(نمائندہ سپورٹس) 17 ویں نیشنل سینئرز کرکٹ کپ کا گرینڈ فائنل میچ عامر کیبلز لاہور اور گولڈ برج میڈیا کراچی کے درمیان حسین لیوائی سٹیڈیم نیا ناظم آباد میں کھیلا گیا۔ عامر کیبلز نے گولڈ برج میڈیا کو 49 رنز سے مات دے کر تاج اپنے سر سجا لیا اور دوسری مرتبہ چیمپئن ہونے کا اعزاز بھی حاصل کر لیا۔ یاد رہے ! عامر کیبلز نے تیسری مرتبہ گرینڈ فائنل کے لیے کوالیفائی کیا تھا۔ گولڈ برج کے کپتان سید مختار احمد نے ٹاس جیت کر عامر کیبلز کو پہلے کھیلنے کی دعوت دی۔ جنہوں نے مقررہ 30 اوورز میں 9 کھلاڑیوں کے نقصان پر 167 رنز بنائے۔ جمشید سلمان نے شاندار بیٹنگ کا مظاہرہ کرتے ہوئے 73 جس میں 10 چوکے بھی شامل تھے، بلال خلجی 27 ، کاشف راجا نے 15 اور جمشید علی نے 12 رنز بنائے۔ گولڈ برج میڈیا کی جانب سے شاندار باﺅلنگ کا مظاہرہ کرتے ہوئے رضوان قریشی نے 5/29، ظفر علی 2/29 محمد وحید 1/27 اور کامل محمود نے 1/14 وکٹ حاصل کیں۔ جواب میں گولڈ برج میڈیا 28.5 اوورز میں تمام کھلاڑیوں کے نقصان پر 118 رنز بنا سکی۔ عامر اقبال نے 30، خالد زبیر 26 اور کامران حسین نے 21 رنز بنائے۔ عامر کیبلز کی جانب سے شاندار باﺅلنگ کا مظاہرہ کرتے ہوئے ریحان رﺅف نے 3/21 ، اکبر علی 3/24 ، جمشید علی 2/17 ، جاوید خان 1/15 اور شکیل ملک نے 1/28 وکٹ حاصل کیں۔ جمشید سلمان مین آف دی میچ جبکہ جمشید علی ٹورنامنٹ کے بہترین کھلاڑی کا اعزاز حاصل کرنے میں کامیاب ہوئے۔ ریاض الدین ، خالد محمود ایمپائر ، انوار خان میچ ریفری، وسیم الدین ر یزرو ایمپائر جبکہ عاطف نیاز خان اور فیصل صدیقی نے سکورر کے فرائض سر انجام دیئے۔