لندن (بی بی سی) ہیری پاٹر، ڈائے ہارڈ، ٹرولی میڈلی ڈیپلی اور رابن ہوڈ جیسی مشہور فلموں میں کام کرنے والے برطانوی اداکار ایلن رکمن کا 69 برس کی عمر میں انتقال ہوگیا ہے۔ ان کے اہل خانہ کا کہنا ہے وہ سرطان میں مبتلا تھے۔ انہیں ہیری پاٹر میں ’پروفیسر سنیپ‘ اور ڈائے ہارڈ میں ’ہینز گروبر‘ سمیت اپنے کئی کرداروں کی بنا پر برطانیہ کے سب سے مقبول اداکاروں میں سے ایک سمجھا جاتا ہے۔ 1991ءمیں فلم رابن ہڈ پرنس آف تھیوس میں ’شیرف آف ناٹنگم‘ کے کردار پر ایلن رکمن نے بافٹا انعام بھی حاصل کیا تھا۔ ان کے اہل خانہ کی جانب سے جاری ہونے والے ایک بیان میں کہا گیا اداکار اور ہدایت کار ایلن رکمن کا سرطان میں مبتلا ہونے کے بعد 69 برس کی عمر میں انتقال ہو گیا ہے۔ اپنے آخری لمحات میں وہ اپنے خاندان اور دوستوں کے ساتھ تھے۔ لندن میں پیدا ہونے والے ایلن رکمن نے اپنے پیشے کی ابتدا رائل شیکسپئیر کمپنی سمیت تھیئٹر سے شروع کی تھی جس کے بعد انہوں نے 80 کی دہائی میں ٹی وی ڈرامے ’سمائلیز پیپل‘ اور ’بارچسٹر کرونکلز‘ میں کردار ادا کیے تھے۔ انھوں نے فلمی دنیا میں ویلن کے کردار ادا کرنے پر سب سے زیادہ شہرت حاصل کی تھی۔
برطانوی اداکار