لاہور(سپورٹس رپورٹر+نمائندہ سپورٹس) پاکستان بیڈمنٹن فیڈریشن نے 12 ساوتھ ایشین گیمز کے لیے مینز اور ویمنز ٹیموں کا اعلان کر دیا ہے۔ نیشنل چیمپئن پلواشہ بشیر اور ماحور شہزاد تربیتی کیمپ میں رپورٹ نہ کرنے کی بنا پر قومی سکواڈ کا حصہ نہیں بن سکیں۔ پاکستان بیڈمنٹن فیڈریشن کے سیکرٹری واجد علی چوہدری نے لاہور میں پریس کانفرنس کرتے ہوئے ٹیم کا اعلان کیا۔ اس موقع پر ان کے ساتھ طیب سہیل بھی موجود تھے۔ واجد علی چوہدری کا کہنا تھا کہ ڈسپلن پر کوئی سمجھوتہ نہیں کیا جائے گا جو کھلاڑی بھی کیمپ اور ٹرائلز میں شریک نہیں ہوگا اسے قومی سکواڈ میں جگہ نہیں دی جائے گی۔ تین روزہ ٹرائلز میں جن کھلاڑیوں کا انتخاب کیا گیا ہے، مینز ٹیم میں ایم عرفان سعید بھٹی، مراد علی، عظم سرور، سید شبر حسین سنگلز میں جبکہ رضوان اعظم اور کاشف علی ڈبلز میں پاکستان کی نمائندگی کرینگے۔ ویمنز ٹیم میں سحر اکرام، خضرا رشید، سدرہ حامد، ہما جاوید سنگلز میں جبکہ صائمہ وقاص اور سارہ مہمند ڈبلز میں شامل ہیں۔