انڈر19 کرکٹ ورلڈ کپ آج سے بنگلہ دیش میں شروع ہو گا
ڈھاکہ (سپورٹس ڈیسک )انڈر 19 کرکٹ ورلڈ کپ آج سے بنگلہ دیش کے شہر چٹاگانگ میں کھیلا جائے گا۔ ٹورنامنٹ میں 16 ٹیمیں حصہ لے رہی ہیں۔پہلے دن دفاعی چیمپئن جنوبی افریقہ کا مقابلہ میزبان ٹیم بنگلہ دیش سے ہوگا جبکہ 1998کی فاتح انگلینڈ کا مقابلہ فیجی سے ہوگا۔ پاکستان کرکٹ ٹیم کے کوچ وقار یونس نے کھلاڑیوں کے نام اپنے پیغام میں کہا ہے کہ انڈر 19 ورلڈ کپ نوجوانوں کے لیے دنیا کو اپنا ہنر دکھانے کا بہترین پلیٹ فارم ہے۔ٹورنامنٹ میں حصہ لینے والے تمام کھلاڑیوں کے لیے میری نیک تمنائیں ہیں اور میں ان کو، خاص طور پر پاکستانی ٹیم کو یہ مشورہ دوں گا کہ ’خوب محنت کریں، ٹورنامنٹ جس طرح کے مواقع آپ کو دیتا ہے اس سے خوب لطف اٹھائیں۔یاد رکھیں کہ آپ اپنے ملک کے سفیر ہیں، اس لیے ضروری ہے کہ آپ میدان میں اور میدان سے باہر اپنی کارکردگی پر فخر کر سکیں۔
