کراچی (آئی این پی) کراچی کے علاقے اورنگی ٹائون میں ڈسکو موڑ پر تیز رفتار بس کی ٹکر سے دو خواتین جاں بحق ہوگئیں‘ مشتعل افراد نے بس کو آگ لگا دی۔ تفصیلات کے مطابق ڈسکو موڑ پر تیز رفتار بس نے بدھ کی صبح دو خواتین کو ٹکر مار دی جس کے بعد خواتین شدید زخمی ہوگئیں، خواتین کو زخمی حالت میں فوری طور پر ہسپتال منتقل کیا گیا جہاں زخموں کی تاب نہ لاتے ہوئے دونوں خواتین جاں بحق ہوگئیں۔ واقعے کے بعد مشتعل افراد نے بس کو نذر آتش کردیا جبکہ ڈرائیور فرار ہوگیا۔ پولیس کا کہنا ہے کہ ڈرائیور کو گرفتار کرنے کی کوششیں کی جارہی ہیں۔ اس سلسلے میں بس کے مالک کا بھی پتہ چلایا جارہا ہے جس کی وجہ سے ڈرائیور کو گرفتار کرنے میں آسانی ہوگی۔ پولیس نے واقعے کی مزید تفتیش شروع کردی۔