شیخوپورہ/ فیروز والا (نامہ نگار خصوصی+ نامہ نگار) نواحی آبادی بھکھی کے قریب نیشنل فیڈ مل کے سامنے تیز رفتار ٹرک کی ٹکر سے رکشے ڈرائیور سمیت تین افراد جاں بحق ہوگئے۔ کاشف، عامر اور عرفان رکشے میں سامان لوڈ کر کے آرہے تھے کہ پیچھے سے آنیوالے ٹرک نے رکشہ کو ٹکر مار دی جس سے رکشہ آنے جانیوالے سریا کے ٹرالر سے ٹکرا گیا جس سے سریا رکشہ ڈرائیور کی آنکھوں اور دوسرے نوجوان کے دل کے قریب سے آر پار ہوگیا جبکہ ان کا تیسرا ساتھی زخمی ہوگیا جو بعد ازاں ہسپتال پہنچ کر زخموں کی تاب نہ لاتے ہوئے ہسپتال میں دم توڑ گیا۔ دوسری طرف فیروز والا سے نامہ نگار کے مطابق شرقپور روڈ پر مڑھ بھنگواں کے قریب دو تیز رفتار موٹر سائیکلیں آپس میں ٹکرا گئیں جس کے نتیجے میں فیکٹری انجینئر احسن علی سمیت دو افراد ہلاک اور دو افراد زخمی ہوگئے۔ ایک زخمی کی حالت نازک بتائی جاتی ہے۔