دبئی (سپورٹس رپورٹر) سابق صدر پاکستان آصف علی زرداری اور سابق وزیر اعظم شہید بے نظیر بھٹو کی دونوں صاحبزادیوں بختاور بھٹو زرداری اور آصفہ بھٹو زرداری نے گذشتہ روز دبئی میں اے پی ایس کے بچوں کے ساتھ جمیرا بیچ کے سکائی ڈائیو رینج میں وقت گذارا۔ اس موقع پر پاکستان سپر لیگ کی ٹیم پشاور زلمی کے کپتان سمیت پوری ٹیم موجود تھی۔ جمیرا بیچ کے سکائی ڈائیو کے مقام پر اے پی ایس اور پشاور زلمی ٹیم کے کھلاڑیوں کے درمیان نمائشی میچ بھی رکھا گیا تھا جس میں بختاور بھٹو زرداری اور آصفہ بھٹو زرداری نے بھی حصہ لیا۔ بختاور بھٹو نے باولنگ کے ساتھ امپائرنگ جبکہ آصفہ بھٹو زرداری نے بیٹنگ کا مظاہرہ کیا۔ بعد ازاں دونوں بہنوں کی جانب سے اے پی ایس بچوں کے لیے کھانے پینے کی اشیا بھی پیش کی گئیں۔ بچوں نے جمیرا بیچ کی سیر کے دوران پشاور زلمی کے کھلاڑیوں کے ساتھ کھیل کر خوب لطف اٹھایا۔