لاہور (نامہ نگار) اورنج لائن ٹرین منصوبے کی تعمیر کے دوران کرین کی زد میں آکر ایک اور مزدور جاں بحق ہو گیا حادثہ گھاس منڈی سٹاپ کے قریب پیش آیا جہاں 20 سالہ مزدور کام کر رہا تھا، جاں بحق مزدور شبیر تعمیراتی کمپنی کا ملازم تھا۔ علاوہ ازیں اورنج لائن ٹرین منصوبے کی وجہ سے ایک طالبہ سمیت تین افراد شدید زخمی ہو گئے ہیں۔ داروغہ والا میں نویں جماعت کی 15سا لہ طالبہ سویرا انور اکیڈمی جانے کے لئے پیدل سڑک عبور کر رہی تھی کہ اورنج لائن ٹرین منصوبے کے لئے کام کرنے والی کرین کی زد میں آگئی۔ جس سے اس کے سر پر شدید چوٹ آئی۔ طبی امداد کیلئے جنرل ہسپتال منتقل کر دیاگیا ہے۔ تاحال تشویشناک بتائی جاتی ہے۔ پولیس نے کرین ڈرائیور کو گرفتار کر لیا ہے۔ باغبانپورہ کے علاقہ شالیمار چوک میں اورنج لائن ٹرین کیلئے کھودے گئے گڑھے سے بچتے ہوئے موٹر سائیکل سوار دو افراد امداد اور ریحان ایک کار سے جا ٹکرائے۔ جس سے دونوں زخمی ہو گئے اور انہیں ہسپتال داخل کرا دیا گیا ہے۔