کراچی (آئی این پی) کراچی کی مقامی عدالت نے ماں کے قاتل غلام ربانی کو عدالتی ریمانڈ پر جیل بھیج دیا ۔ جوڈیشل مجسٹریٹ سائوتھ کی عدالت میں ماں کے قاتل غلام ربانی کوپولیس نے پیش کیا۔ بوٹ بیسن پولیس ریمانڈ ختم ہونے پر ملزم کو عدالت لائی۔ سماعت کے دوران تفتیشی افسر نے عدالت کو بتایا کہ ملزم کی بہن نے ہوش میں آنے کے بعد بتایا کہ قتل غلام ربانی نے کیا ہے۔ مقدمے میں ملزم کی بہن گواہ ہے۔ ملزم کی بہن کی حالت بہتر ہونے پر اس کا بیان ریکارڈ کیا جائے گا۔ عدالت نے ملزم کو 14 دن کے عدالتی ریمانڈ پر جیل بھیج دیا اور تفتیشی افسرکو ہدایت کی کہ آئندہ سماعت پر مقدمے کا چالان پیش کیا جائے۔ واضح رہے کہ ملزم غلام ربانی نے پولیس کو دیئے گئے ابتدائی بیان میں کہا تھا کہ ماں اور بہن کے جھگڑے کے دوران اس نے مشتعل ہو کر قتل کیا۔ ملزم گزشتہ سماعت میں عدالت میں اپنے اس بیان سے منحرف ہوگیا اور عدالت میں بیان دیا کہ والدہ کا قتل ہوا تو میں گھر میں نہیں تھا۔ مجھے پتہ چلا کہ ڈاکوئوں نے مزاحمت پر والدہ کو قتل کیا ہے۔