منڈی بہاؤالدین، شیخوپورہ (نامہ نگار+ نامہ نگار خصوصی) ٹریفک حادثات میں 2 خواتین سمیت 4 افراد جاں بحق جبکہ خاتون اور 2 افراد شدید زخمی ہو گئے۔ تفصیلات کے مطابق منڈی بہاؤالدین میں تیز رفتاری کے باعث دو موٹر سائیکل آپس میں ٹکرا گئے جس کے نتیجے میں دو نوجوان جاں بحق جبکہ خاتون سمیت دو افراد زخمی ہو گئے۔ نواحی علاقہ کے سرمد اور ظہیر موٹر سائیکل پر مانو چک سے کالج پڑھنے کیلئے جا رہے تھے ہیلاں روڈ پر مخالف سمت سے آنے والے موٹر سائیکل سے ٹکرا گئے جس سے سرمد موقع پر ہی جاں بحق ہو گیا جبکہ ظہیر، سرور اور ایک خاتون زخمی ہو گئی جنہیں ہسپتال منتقل کیا گیا تاہم زخموں کی تاب نہ لاتے ہوئے ظہیر بھی ہسپتال میں دم توڑ گیا۔شیخوپورہ سے نامہ نگار خصوصی کے مطابق موٹروے فاروق آباد کے قریب تیز رفتار کار ٹائر پھٹ جانے کے باعث بے قابو ہوکر الٹ گئی جس کے نتیجہ میں کار میں سوار دو خواتین جاں بحق جبکہ دو شدید زخمی ہوگئے۔ زخمیوں کو فوری طبی امداد کیلئے ڈسٹرکٹ ہیڈ کوارٹر ہسپتال شیخوپورہ لایا گیا جہاں تشویشناک حالت کے باعث میو ہسپتال لاہور ریفر کردیا گیا۔ کار سوار فیملی لاہور سے فیصل آباد جارہی تھی۔ گاڑی بے قابو ہوکر موٹروے کا جنگلہ توڑتی ہوئی قریبی کھیتوں میں جا گری جاں بحق ہونیوالوں میں 45 سالہ خاتون بلقیس بی بی اور 15سالہ بچی شامل ہے۔