لاہور (خبرنگار) وزیراعلیٰ پنجاب محمد شہباز شریف نے قصور کے علاقہ راجہ جنگ کے نواحی دیہات میں اینٹوں کے 2 بھٹوں پر اچانک چھاپے مارے۔ وزیراعلیٰ کے ان دوروں کی اطلاع سے قصور کی انتظامیہ لاعلم تھی۔ ایک بزرگ مزدور نے کہا جس طرح آپ دن رات ہمارے بچوں کیلئے کام کر رہے ہیں وہ مثالی ہے۔ اس موقع پر بزرگ مزدور نے وزیراعلیٰ کو دعا دیتے ہوئے کہا ’’تینوں رب دیاں رکھاں‘‘۔ شہباز شریف نے قصور سے واپسی پر اچانک دو دفعہ اپنا ہیلی کاپٹر راجہ جنگ کے نواحی دیہات میںقریبی کھیتوں میں اتارا اور بغیر اطلاع اینٹوں کے بھٹوں پر چھاپے مارکر چائلڈ لیبر کے حوالے سے کئے جانے والے حکومتی اقدامات کا جائزہ لیا۔ وزیراعلیٰ کو دیکھ کر بڑی تعداد میں دیہاتی اوربھٹہ مزدور اکٹھے ہو گئے اور انہوں نے وزیراعلیٰ شہبازشریف ’’زندہ باد‘‘ کے نعرے لگائے۔