اسلام آباد (آن لائن) برطانوی سیاست میں انتہائی اہم سمجھے جانے والے لندن میئر کے عہدے کیلئے 3 مضبوط امیدواروں کا پاکستان کے ساتھ قریبی تعلق ہے۔ لیبر پارٹی کے پسندیدہ امیدوار صادق خان کے دادا تقسیم ہند کے موقع پر بھارت سے کراچی آگئے تھے۔ کنزرویٹیو پارٹی کے امید وار زیک گولڈ سمتھ عمران خان کے سابق برادر نسبتی ہیں جبکہ تیسرے امیدوار جارج گیلوے طویل عرصے سے بھٹو خاندان کے قریب ہیں۔لندن میں میئر کے الیکشن کی میڈیا کوریج تینوں امید واروں کے طبقوں پر مرکوز ہے کیونکہ ایک طرف 200 ملین پاؤنڈز دولت کے ساتھ انتہائی امیر زیک ہیں تو وہیں صادق خان ایک بس ڈرائیور کے بیٹے ہیں جو 1960ء میں برطانیہ آئے۔ صادق اپنی انتخابی مہم میں کہتے ہیں کہ لندن نے انہیں بہت مواقع فراہم کیے اور ان کی قیادت میں یہ شہر دوسروں کو بھی ایسے مواقع دے گا۔ زیک گولڈ سمتھ کی انتخابی مہم میں جمائما اور عمران خان کا 18 سالہ بیٹا سلیمان عیسی خان بھی حصہ لے رہے ہیں۔ واضح رہے زیک ماضی میں عمران خان کو ’پاکستان کے مسائل کا حل‘ قرار دے چکے ہیں اور عمران بھی ان کیلئے اچھے خیالات رکھتے ہیں۔ گزشتہ کئی سالوں میں صہورنیت اورعراق پر قبضے کی مخالفت کرنے پر جارج گیلوے کو کئی برطانوی پاکستانیوں کی حمایت حاصل ہے۔ جارج الیکشن میں مسلمانوں کے ووٹ بنک پر انحصار کر رہے ہیں۔