اسلام آباد (سٹاف رپورٹر + ایجنسیاں) آرمی چیف جنرل راحیل شریف نے انسداد دہشتگردی تربیتی مرکز پبی میں پاکستان اور ترکی کی مشترکہ فوجی مشقوں ’’اتاترک9‘‘ کا معائنہ کیا۔ یہ مشقیں دونوں ممالک کی افواج کے درمیان ہونے والی سالانہ مشقوں کا حصہ ہیں۔ دو ہفتے جاری رہنے والی اتا ترک 9 مشقیں دو مراحل میں ہوئیں پہلے مرحلے میں استور کے قریب رتو کے مقام پر برفانی ماحول میں جب کہ بعدازاں جہلم کے قریب پبی کے علاقہ میں مشقیں منعقد کی گئیں۔ ترکی کی سپیشل فورسز اور ترک مائونٹین کمانڈو نے پاکستانی فوجیوں کے ہمراہ مشقوں میں حصہ لیا۔