گرانٹ فلاور، گرانٹ لیوڈن کی شہریار سے ملاقات، کارکردگی سے آگاہ کیا
لاہور(سپورٹس رپورٹر+ نمائندہ سپورٹس) ورلڈکپ میں قومی ٹیم کی ناقص کارکردگی کے بعد قومی ٹیم کے بیٹنگ کوچ گرانٹ فلاور اور فیلڈنگ کوچ گرانٹ لیوڈن نے چیئرمین پی سی بی شہریار خان سے ملاقات کی۔ قذافی سٹیڈیم میں ہونیوالی ملاقات میں دونوں کوچز نے ٹیم کی حالیہ کارکردگی کے حوالے سے چیئرمین شہریار خان کو تفصیلی آگاہ کیا۔ فیلڈنگ کوچ نے تفصیل کے ساتھ کھلاڑیوں کے بارے میں چیئرمین کو بتایا، گرانٹ لیوڈن نے فیلڈنگ معیاری نہ ہونے کی وجہ کھلاڑیوں کے فٹنس لیول کم ہونا قرار دیا۔ ذرائع کے مطابق بیٹنگ کوچ گرانٹ فلاور نے بھی بیٹسمینوں کی خامیوں پر روشنی ڈالی۔ چیئرمین نے کوچز سے ملاقات کے دوران تمام کھلاڑیوں کی رپورٹ لی اور ٹیم کی شکست پر افسوس کا اظہار کیا۔
