دہلی(سپورٹس ڈیسک) جنوبی افریقہ نے ورلڈ ٹی ٹونٹی کے سپر 10 مرحلے کے آخری میچ میں سری لنکا کو 8 وکٹوں سے شکست دے کر اپنا سفر مکمل کرلیا۔ جنوبی افریقہ نے ٹاس جیت کر پہلے فیلڈنگ کا فیصلہ کیا ۔سری لنکن اوپنرز نے پانچ اوورز میں 45 رنز کا آغاز فراہم کیا تاہم سپنر ایرون فنگیسو نے 45 کے سکور پر دنیش چندیمل کو آؤٹ کر کے اپنی ٹیم کو پہلی کامیابی دلائی اور اس کے بعد میچ کا نقشہ یکسر بدل گیا۔فنگیسو نے اگلی ہی گیند پر لہیرو تھری مانے کو خوبصور گیند پر باؤلڈ کر کے اپنی ٹیم کو لگاتار دوسری کامیابی دلائی۔ملندا سری وردانا اور تلکارتنے دلشان نے سکور کو 75 تک پہنچایا لیکن اسی سکور پر سری وردانا وکٹوں کے درمیان غلط فہمی کے نتیجے میں رن آؤٹ ہو گئے۔سکور میں تین رنز کے اضافے کے بعد شیہان جے سوریا کی اننگز اختتام پذیر ہوئی جبکہ 85 کے مجموعے پر دلشان 36 رنز بنا کر پویلین لوٹے تو آدھی سری لنکن ٹیم ڈریسنگ روم میں موجود تھی۔ا پوری ٹیم اننگز کے آخری اوور میں 120 رنز پر جواب دے گئی۔ کائل ایبٹ، ایرون فنگیسو اور فرحان بیہارڈین نے دو دو وکٹیں حاصل کیں۔ہاشم آملانے کوئنٹن ڈی کوک کے ساتھ مل کر ہدف حاصل کرنے کی بنیاد رکھی لیکن ڈی کوک زیادہ دیر ان کا ساتھ نہ دے سکے اور 9 رنز بنا کر آؤٹ ہوئے۔کپتان فیف ڈوپلیسی نے دوسری وکٹ میں آملہ کا بھر پور ساتھ دیا، دونوں کی رفاقت میں 60 رنز بنے تھے کہ ڈوپلیسی 31 رنز بنا کر لکمل کا شکار بنے۔ہاشم آملہ اور اے بی ڈی ولیئرز نے ہدف کو حاصل کرنے کے لیے 47 رنز کی ناقابل شکست شراکت قائم کی، اس دوران ہاشم آملہ نے اپنی نصف سنچری بھی مکمل کی۔آملہ 56 اور ڈی ولیئرز 20 رنز بنا کر ناقابل شکست رہے۔جنوبی افریقہ نے 121 رنز کا ہدف 17 ویں اوور کی چوتھی گیند پر 2 وکٹوں کے نقصان پر حاصل کرلیا۔فنگیسو کو میچ کا بہترین کھلاڑی قرار دیا گیا۔سری لنکا اور جنوبی افریقہ دونوں ٹیمیں پہلے ہی ورلڈ ٹی ٹوئنٹی کی دوڑ سے باہر ہوچکی ہیں۔