اسلام آباد (این این آئی) تحریک انصاف کی ترجمان شیریں مزاری نے سندھ کے وزیر اطلاعات مولا بخش چانڈیو کے بیان پر ردعمل میں کہا ہے کہ عمران خان سے متعلق مولا بخش چانڈیو کا بیان انتہائی شرمناک ہے، عمران خان کی کوششوں سے خیبر پختونخوا گڈ گورننس میں آگے بڑھ رہا ہے۔ انہوں نے کہاکہ حالیہ پلڈاٹ سروے سے سندھ کی صورت حال سب کے سامنے آ گئی ٗ شیریں مزاری نے کہا کہ سندھ میں حکومتی نااہلی کے باعث کرپشن عروج پر ہے، سندھ بھر میں تعلیم اور صحت کی سہولیات نہ ہونے کے برابر ہیں، تھر میں بھوک اور افلاس معصوم بچوں کی جان لے رہی ہے، مولا بخش چانڈیو سیاسی طور پر بے روزگار ہیں، وہ تنقید کرنے کی بجائے اپنے گریبان میں جھانکیں۔