لاہور(نمائندہ سپورٹس) سولیٹائرفیصل بینک پولو کپ آج بروز منگل سے لاہور پولو کلب میں شروع ہوگا۔ٹورنامنٹ میں چھ ٹیموں کو دو پولز میں تقسیم کیا گیا۔ فیصل بینک نے گزشتہ ہفتے بھی پولو ٹورنامنٹ کو سپانسر کیا تھا۔ پول اے میں ماسٹر پینٹس ، نیوایج اور ریجاس جبکہ پول بی میں جے ایس بینک، سب وے اور گارڈ گروپ کی ٹیمیں شامل ہیں۔0 سے 4 گول ٹورنامنٹ کے اس ایونٹ کا پہلا میچ آج بروز منگل ماسٹر پینٹس اور نیوایج کے درمیان 3.45 پر کھیلا جائے گا جبکہ دوسرا میچ 4.45 پر جے ایس بینک اور سب وے کے درمیان ہوگا۔بدھ اور جمعہ کو بھی دو دو میچز ہوں گے جبکہ ٹورنامنٹ کا مین فائنل 10 اپریل اتوار کو ہوگا۔ لاہور پولو کلب کے صدر عرفان علی حیدر کے مطابق فیصل بینک کی انتظامیہ کا شکریہ جنہوں نے دوسرے ہفتے بھی اپنی سپورٹ جاری رکھی۔ سپانسرز کسی بھی کھیل کی پرموشن میں سب سے اہم کردار ادا کرتے ہیں۔ پول اے کی ٹیموں میں ماسٹر پینٹس کی ٹیم میں شاہ چنگیز عالم، فاروق امین صوفی، عثمان حئی اور احمد نواز ٹوانہ، نیوایج میں المان جلیل اعظم، حسن عباس، چودھری حسن منصور اور چودھری فتح محمود جبکہ ریجاس کی ٹیم میں بابر منوں، عامر چیمہ یا قدیر اشفق، فیصل شہزاد اور محمد عثمان ملک شامل ہیں۔ پول بی کی ٹیموں میں جے ایس بینک میں تیمور حیات نون، سیف اللہ نون اور اعظم حیات نون، سب وے میں عبداللہ دائود، میر حذیفہ احمد، جبکہ گارڈ گروپ کی ٹیم میں صوفی ہارون، بلال حیدر آغا، میاں حسن افتخار اور تیمور علی ملک شامل ہیں۔