جموں/نئی دہلی ( آئی این پی )مقبوضہ کشمیر کے ضلع ڈوڈہ میں مسافر بس کھائی میں گرنے سے 6 افراد جاں بحق اور 59 زخمی ہوگئے ۔ اتوار کو بھارتی میڈیا کے مطابق مقبوضہ کشمیر کے ضلع ڈوڈہ میں مسافر بس سڑک سے پھسل کر ایک گہری کھائی میں جاگری جس کے نتیجے میں 6 افرادجاں بحق اور 59 زخمی ہوگئے ہیں۔پولیس ذرائع نے بتایا کہ حادثہ کا شکار بننے والی بس دھارا سے ڈوڈہ جارہی تھی۔ سہ پہر ساڑھے چار بجے یہ بس ڈرائیور کے قابو سے باہر ہوکر قریب 200 فٹ گہری کھائی میں جاگری۔3 مسافر موقع پر جبکہ 3 ہسپتال لے جاتے ہوئے راستے میں دم توڑ گئے ۔حادثے کے فوری بعد امدادی سرگرمیاں شروع کردی گئیں اور زخمیوں کو قریبی ہسپتالوں میں منتقل کردیا گیا جہاں7 افراد کی حالت تشویشناک بتائی جاتی ہے ۔