یوٹیلٹی سٹورز کارپوریشن میں وسیع پیمانے پر تقرر اور تبادلے
اسلام آباد (عترت جعفری) یوٹیلٹی سٹورز کارپوریشن میں جی ایم اور نچلے درجہ کے مناصب اور زونز پر وسیع پیمانے پر تقرر و تبادلے کردئیے گئے ہیں۔ تبادلوں میں خصوصی طور پر ایسے افسر زد میںآئے ہیں جو حال ہی میں او ایس ڈی بنائے جانے والے افسروں سے قربت رکھتے تھے جبکہ تبادلہ کی زد میں آنے والے بعض افسروں نے رابطہ کرکے بتایاکہ ان کی کارکردگی کے باوجود چند ماہ کے بعد ہی تبدیل کردیا گیا ہے۔ یوٹیلٹی سٹورز کارپوریشن جو نقصانات سے دوچار ہے، سیلز گر رہی ہیں اور اعلی تعلیم یافتہ اور کارکردگی کے حامل ملازمین کا کوئی پرسان حال نہیں۔ 46 افسر بیک جنبش قلم تبدیل کر دئیے گئے۔ کارپوریشن کے نئے ایم ڈی گلزار شاہ حال ہی میں تعینات ہوئے ہیں۔ وزارت صنعت کے ذرائع نے بتایا ہے کہ جی ایم سحود عالم نیازی کے او ایس ڈی بنائے جانے کے بعد عنایت اﷲ کو جی ایم ایچ آر اینڈ اے کے منصب پر کنفرم کر دیا گیا۔ گریڈ 20 کے عنایت اﷲ دولہ اس سے قبل عارضی بنیاد پر جی ایم کے منصب پر تعینات تھے۔ گریڈ 19 کے افسر جاوید منظور کو جی ایم سٹورز آپریشن‘ گریڈ 18کے افسر جہانزیب خان کو جی ایم پروجیکٹ تعینات کردیا گیا۔ زونز میں بڑی تبدیلیاں کی گئی ہیں۔ محمد ارشد رانجھا کو اسلام آباد سے تبدیل کرکے زونل منیجر سرگودھا‘ مہتاب بنوری کو پشاور سے تبدیل کرکے زونل منیجر ایبٹ آباد‘ مختار احمد خٹک کو ایبٹ آباد سے تبدیل کرکے زونل منیجر پشاور‘ گریڈ 17 کے غلام مرتضیٰ کو ریجنل منیجر اسلام آباد سے تبدیل کر کے زونل منیجر اسلام آباد تعینات کیا گیا۔ غلام مرتضیٰ گزشتہ 8 سال سے اسلام آباد میں تعینات ہیں اور محض ایک منصب سے دوسرے منصب تک کا سفر کر رہے ہیں۔ گریڈ 17 کے ریجنل منیجر جاوید مشتاق کو سرگودھا سے تبدیل کرکے زونل منیجر ملتان تعینات کردیا گیا۔ گریڈ 18 کے افسر اکبر درانی کو جونیئر جی ایم ایچ آر اے‘ شادی خان کو زونل منیجر لاہور کے منصب سے تبدیل کرکے جی ایم لیگل تعینات کر دیا گیا۔ کمال مصطفیٰ کو جی ایم ویجی لینس اور گریڈ 18 کے افسر حیدر رضا بخاری کو جی ایم انشورنس تعینات کیا گیا ہے۔ فیضان حمید کو زونل منیجر لاہور تعینات کر دیا گیا ہے۔
